Liverpool është shpallur klubi anglez me të ardhurat më të larta për herë të parë në histori, duke gjeneruar 836 milionë euro të ardhura gjatë sezonit 2024/25, sipas raportit më të fundit të Deloitte Football Money League.
Megjithatë, pavarësisht kryesimit në Angli, klubi renditet i pesti në nivel global, pas Real Madrid, Barcelona, Bayern Munich dhe Paris Saint-Germain.
Sipas Deloitte, rritja e ndjeshme e të ardhurave lidhet me sezonin e suksesshëm të Liverpoolit, ku fitoi titullin kampion, si edhe me rikthimin në UEFA Champions League, që solli një rritje të madhe të të ardhurave nga transmetimet televizive.
“Liverpool raportoi të ardhura totale prej 836 milionë eurosh, të nxitura nga një rritje prej 34% e të ardhurave nga transmetimet pas rikthimit në Champions League, si dhe një rritje prej 7% e të ardhurave komerciale falë organizimit të më shumë eventeve jashtë ditëve të ndeshjeve në ‘Anfield’”, thuhet në raportin e Deloitte.
Rënie për rivalët anglezë
Ndërkohë, disa nga rivalët kryesorë anglezë kanë pësuar rënie në renditjen globale. Manchester City zbriti nga vendi i dytë në të gjashtin, me 829 milionë euro të ardhura, pas një sezoni nën pritshmëritë e zakonshme.
Manchester United ra në vendin e tetë – pozicioni më i ulët në historinë e Money League – pavarësisht se arkëtoi 793 milionë euro. Rënia lidhet kryesisht me uljen e të ardhurave nga transmetimet, pas një sezoni të dobët sportiv, ku klubi përfundoi i 15-ti në Premier League dhe humbi finalen e Europa League.
Arsenal u rendit i shtati me 822 milionë euro, ndërsa Tottenham Hotspur mbajti vendin e nëntë me 673 milionë euro. Chelsea plotësoi dhjetëshen e parë globale me 584 milionë euro të ardhura.
Jashtë “Big Six”
Jashtë gjashtë klubeve tradicionale, Aston Villa u ngjit në vendin e 14-të me 450 milionë euro, falë rikthimit në kompeticionet europiane. Newcastle United u rendit i 17-ti me 400 milionë euro, ndërsa West Ham United mbylli përfaqësimin anglez në Top 20, në vendin e 20-të, me 276 milionë euro.
Kryeson Real Madrid
Në krye të renditjes globale, Real Madrid mbeti klubi me të ardhurat më të larta në botë për të dytin vit radhazi, duke gjeneruar 1.2 miliardë euro, pavarësisht se nuk fitoi as La Liga dhe as Champions League.
Barcelona u rikthye në vendin e dytë me 975 milionë euro, e ndihmuar nga performanca e fortë komerciale dhe të ardhurat nga rinovimi i stadiumit. Bayern Munich u rendit i treti me 861 milionë euro, ndërsa fituesi i Champions League, Paris Saint-Germain, zuri vendin e katërt me 837 milionë euro.
“Sezoni 2024/25 vendosi një tjetër rekord, me 20 klubet e para të Money League që gjeneruan për herë të parë mbi 12 miliardë euro të ardhura”, nënvizon raporti i Deloitte.
