Një tjetër skandal me gjykimin në Premier League ka trazuar ujërat e futbollit anglez. Trupi drejtues i arbitrave profesionistë (PGMOL) ka lëshuar një deklaratë zyrtare ku pranon publikisht gabimin e rëndë të bërë gjatë përballjes mes Arsenal-it dhe Liverpool-it.
Sipas konfirmimit nga vetë organizata e gjyqtarëve, gjatë një episodi kritik në zonën e rreptësisë, mbrojtësi i Arsenal-it, Jurrien Timber, e ka tërhequr haptazi nga fanella sulmuesin Alexander Isak midis ajrit, duke e penguar atë të godasë topin me kokë drejt rrjetës.
Në deklaratën e saj, PGMOL sqaron se pas rishikimit të pamjeve është plotësisht e qartë se veprimi i Timber përbënte një faull të padiskutueshëm dhe se loja duhej të ishte ndërprerë për t’i dhënë penallti Liverpool-it.
Përveç pranimit të gabimit, PGMOL njoftoi se ka nisur një hetim të brendshëm për të analizuar vendimmarrjen e arbitrit dhe rrethanat që çuan në këtë dështim të VAR-it, ndërsa po ashtu ka kontaktuar drejtpërdrejt klubin e Liverpool-it për t’i kërkuar falje zyrtarisht.
Ky incident ka ndezur reagime të fuqishme dhe revolte te tifozët e Liverpool-it në rrjetet sociale, të cilët kanë shpërthyer me akuza ndaj sistemit të gjykimit dhe VAR-it për mungesë objektiviteti në ndeshjet e tyre.
