Një audio që pretendohet se i përket komunikimit mes arbitrit kryesor dhe dhomës së VAR-it gjatë ndeshjes Liverpool-Arsenal ka shkaktuar polemika të reja në futbollin anglez.
Sipas transkriptit që po qarkullon në rrjetet sociale, zyrtarët e VAR-it kanë evidentuar një tërheqje të fanellës ndaj sulmuesit të Liverpoolit, Alexander Isak, duke pranuar se mund të bëhej fjalë për një penallti të mundshme.
Në komunikimin e publikuar, arbitri pyet: “A pati ndonjë incident për t’u shqyrtuar?”, ndërsa asistenti i VAR-it përgjigjet: “Mund të shohim një tërheqje të fanellës, mund të jetë një penallti e mundshme”.
Megjithatë, arbitri vendos të mos e rishikojë pamjen në monitorin anësor, duke u shprehur: “Do ta lëmë kështu. Nuk do të shkoj te ekrani. Është shumë larg”.
Ky komunikim ka ndezur zemërimin e tifozëve të Liverpoolit, të cilët pretendojnë se skuadra e tyre është privuar nga një mundësi për të fituar një penallti. Polemikat janë shtuar edhe për shkak të dyshimeve mbi mënyrën se si është marrë vendimi përfundimtar.
Nëse audioja është autentike, rasti ngre pikëpyetje serioze mbi procesin e vendimmarrjes dhe zbatimin e protokollit të VAR-it në Premier League.
