DEMI HOTEL
Historia jonë fillon në vitin 1992, kur babai ynë i ndjerë, Nazmi Demi, bleu një pronë në qytetin e Sarandës.
Në atë kohë, aty ndodhej vetëm një shtëpi e vjetër, pothuajse e rrënuar, e rrethuar nga një bahçe me portokalle. Ishin vite të vështira ekonomikisht, por babai ynë kishte një ëndërr dhe, mbi të gjitha, kishte vullnetin për të punuar.
Me duart e tij filloi restaurimin e shtëpisë. Krahas saj ndërtoi edhe një shtesë të vogël, ku krijoi një kuzhinë modeste dhe një sallë me vetëm 4 tavolina. Jashtë, në verandë, vendosi edhe 7 tavolina të tjera.
Kështu, me vetëm 11 tavolina, shumë pak mundësi, por me shumë dëshirë, nisën themelet e biznesit tonë familjar.
Në tetor të vitit 1995, hapëm dyert për herë të parë.
Nëna jonë, Enise, punonte në kuzhinë. Ne, fëmijët, bënim gjithçka që ishte e nevojshme: shërbenim, pastronim, ndihmonim në kuzhinë dhe kudo ku kishte nevojë. Babai merrej me organizimin dhe drejtimin e biznesit.
Nuk kishte role të mëdha apo të vogla. Ishim një familje dhe punonim të gjithë për të njëjtën ëndërr.
Fillimi ishte i vështirë. Kishte ditë të gjata, lodhje dhe shumë sakrifica. Por vit pas viti, me punë dhe këmbëngulje, biznesi filloi të konsolidohej dhe restoranti ynë u kthye gradualisht në një pikë referimi për Sarandën.
Deri në vitin 2009, shtëpia e vjetër vazhdonte të ishte aty, ndërsa restoranti ishte zgjeruar ndjeshëm. Nga 11 tavolinat e para, tashmë kishim një aktivitet shumë më të madh dhe një emër të krijuar ndër vite.
Por në prill të vitit 2010, familja jonë përjetoi momentin më të dhimbshëm të kësaj historie.
Babai ynë, Nazmi Demi, u nda nga jeta.
Dhimbja më e madhe për ne është se ai nuk pati mundësinë të shihte zhvillimet e mëdha që do të vinin më pas. Por çdo gjë që kemi ndërtuar që nga ajo ditë mban brenda saj punën, vizionin dhe frymën e tij.
Po në vitin 2010 hapëm Demi Beach, një beach bar që u bë një hap shumë i rëndësishëm në zhvillimin e mëtejshëm të biznesit tonë familjar.
Në vitin 2011, morëm një nga vendimet më të mëdha: shembëm shtëpinë e vjetër ku kishte filluar gjithçka dhe nisëm ndërtimin e hotelit tonë të parë.
Më 12 korrik 2014, u inaugurua Demi Hotel, fillimisht me vetëm 12 dhoma.
Rrugëtimi vazhdoi.
Në 2015, hoteli u zgjerua në 17 dhoma.
Në 2016, arritëm në 21 dhoma dhe po atë vit bëmë një tjetër investim të rëndësishëm, duke krijuar City Lounge, i cili shtoi një dimension të ri në shërbimet tona.
Në 2019, nisëm ndërtimin e hotelit të dytë.
Një vit më vonë, ai u inaugurua dhe kapaciteti ynë arriti në 44 dhoma.
Dhe në 2026, pas më shumë se tri dekadash nga hapat e parë të babait tonë në atë shtëpi të vjetër, përfunduam hotelin e tretë.
Sot kemi arritur në 70 dhoma.
Nga një shtëpi pothuajse e rrënuar, një bahçe me portokalle, një kuzhinë e vogël dhe 11 tavolina, sot Demi Hotel është një mini-kompleks që përfshin:
70 dhoma, restorant, plazh, pishinë, SPA, beach bar dhe lounge bar.
Por këto janë vetëm shifra dhe ndërtesa.
Historia e vërtetë që qëndron pas tyre është shumë më e madhe.
Është historia e një familjeje që ka punuar për më shumë se 30 vjet, shpesh pa parë orën, pa dalluar ditën nga nata, verën nga dimri apo festën nga një ditë e zakonshme pune.
Kemi punuar të gjithë, të mëdhenj e të vegjël. Ka pasur periudha kur kemi punuar pothuajse 24 orë në ditë.
Çdo gjë që është ndërtuar këtu është bërë me punë, sakrificë, dashuri dhe shumë pasion.
Dy njerëzit nga të cilët filloi gjithçka
Nazmi Demi dhe Enise Demi janë arkitektët e vërtetë të kësaj historie.
Babai ynë na dha mundësinë të ndërtonim të ardhmen tonë në vendin tonë. Na mësoi të punonim, të mos kishim frikë nga vështirësitë dhe të besonim se me punë mund të ndërtohej diçka e madhe edhe duke nisur nga shumë pak.
Jemi krenarë për të madhin Nazmi Demi.
Krenarë që na krijoi mundësinë të punonim në biznesin tonë familjar dhe që rruga jonë u ndërtua këtu, në Sarandë.
Fatkeqësisht, ai nuk arriti ta shihte se ku mbërriti ëndrra që nisi me duart e tij. Por ne e dimë se çdo gur i këtij biznesi mban diçka prej tij.
Dhe pranë tij, që nga dita e parë, ishte nëna jonë, Enise.
Nga kuzhina e vogël e vitit 1995, deri te Demi Hotel i sotëm, ajo ka qenë gjithmonë aty.
Sot, në moshën 71-vjeçare, vazhdon të jetë një nga shtyllat e familjes dhe biznesit tonë.
Dhe ne e themi gjithmonë me dashuri dhe krenari:
Nëna jonë është “ministrja e financave” më e mirë në botë.
Zoti i dhëntë shëndet dhe jetë të gjatë, që ta gëzojë sa më shumë frytin e djersës dhe punës së saj, së bashku me familjen e saj të madhe.
⸻
Ky është vetëm një historik i shkurtër për të përshkruar një rrugë shumë të gjatë.
Ndoshta disa faqe nuk mjaftojnë për të treguar lodhjen, sakrificat, vështirësitë, gëzimet dhe emocionet e gjithë këtyre viteve.
Por ishte e domosdoshme që kjo histori të shkruhej.
Që ta dinë fëmijët tanë.
Që ta dinë brezat që do të vijnë.
Që të mos harrohet kurrë se nga filluam.
Nga një shtëpi e vjetër me një bahçe portokallesh, në vitin 1992…
…në një histori familjare që vazhdon edhe sot.
Dhe pavarësisht sa shumë mund të zhvillohet Demi Hotel në të ardhmen, për ne fillimi do të mbetet gjithmonë i njëjtë:
Nazmi dhe Enise Demi.
Një familje.
11 tavolina.
Shumë punë.
Dhe një ëndërr.
Me mirënjohje dhe respekt për ata që e nisën këtë rrugëtim dhe për të gjithë ata që kanë qenë pjesë e tij ndër vite.
Familja DEMI
