Polonia ka ndryshuar legjislacionin për të lejuar ushtarët të përdorin municion të vërtetë në kufirin lindor të vendit, ndërsa paralajmërimet ndaj personave që sulmojnë trupat polake janë ashpërsuar.
Lajmi u bë publik nga eurodeputeti polak Dominik Tarczyński, i cili, gjatë një fjale në Parlamentin Evropian në Strasburg më 8 korrik, deklaroi se ushtarët polakë tashmë kanë të drejtë të përdorin municion të vërtetë në kushtet e përcaktuara nga ligji.
“Kur ushtari ynë u vra me një shtizë, ne ndryshuam ligjin dhe tani ushtarët tanë mund të përdorin municion të vërtetë”, deklaroi Tarczyński, duke paralajmëruar se kushdo që sulmon ushtarët polakë do të përballet me pasoja të rënda.
Ligji u miratua nga Parlamenti polak në korrik 2024 dhe u firmos në gusht të po atij viti nga presidenti i atëhershëm Andrzej Duda. Ndryshimet erdhën pas vrasjes së ushtarit 21-vjeçar Mateusz Sitkek, i cili u godit me thikë gjatë përpjekjeve për të ndaluar kalimet e paligjshme të kufirit nga Bjellorusia.
Legjislacioni parashikon mbrojtje ligjore për ushtarët dhe efektivët e tjerë të uniformuar që përdorin armë zjarri për të zmbrapsur një sulm të drejtpërdrejtë në kufi. Sipas autoriteteve polake, synimi është rritja e sigurisë së kufirit dhe mbrojtja më efektive e personelit ushtarak.
Megjithatë, ndryshimet kanë shkaktuar shqetësime te organizatat e të drejtave të njeriut. Amnesty International ka paralajmëruar se rregullat e reja mund të krijojnë një hapësirë ligjore që lejon shmangien e përgjegjësisë për përdorimin e forcës, ndërsa përfaqësues të Këshillit të Evropës kanë ngritur pikëpyetje për përputhshmërinë e tyre me detyrimet ndërkombëtare për të drejtat e njeriut.
Pavarësisht kritikave, ligji u miratua me mbështetje të gjerë ndërpartiake në Parlamentin polak.
