WASHINGTON, 22 shtator – Reuters – Ndërsa agjenda e tij po përballet gjithnjë e më shumë me rezistencë, presidenti amerikan Donald Trump po i rikthehet një strategjie të njohur: justifikimit të nismave të tij përmes sigurisë kombëtare.
Vetëm këtë fundjavë, Trump deklaroi se harku monumental 250 këmbë i lartë që planifikon të ndërtojë pranë Washingtonit do të shërbejë gjithashtu si një “kompleks ushtarak”, i pajisur me snajperë, dronë dhe municione, për të garantuar sigurinë kombëtare.
Të hënën, Trump shkroi në rrjetet sociale se mediat që ai ka ndaluar në Shtëpinë e Bardhë – CNN, MS NOW dhe Politico – përbëjnë një “kërcënim për sigurinë tonë kombëtare”.
Deklaratat janë pjesë e një fushate më të gjerë të presidentit për të përdorur argumentin e sigurisë kombëtare për të mbrojtur vendimet e tij përballë pengesave ligjore, kundërshtimit politik dhe reagimeve publike.
Gjatë mandatit të dytë, Trump ka përmendur sigurinë kombëtare për të mbështetur projektin e sallës së re të ballove prej 400 milionë dollarësh në Shtëpinë e Bardhë, anulimin e projekteve të parqeve eolike në det, dërgimin e trupave të Gardës Kombëtare në qytete të drejtuara nga demokratët, si dhe një pjesë të tarifave ndaj mallrave të huaja.
Në secilin rast, argumenti i sigurisë ka shërbyer për të forcuar autoritetin presidencial, edhe në mungesë të një miratimi formal nga Kongresi.
Ekspertë ligjorë thonë se, megjithëse presidentët amerikanë e kanë përdorur prej kohësh sigurinë kombëtare si argument ligjor dhe politik, Trump po e shtrin këtë justifikim në një gamë më të gjerë çështjesh, përfshirë disa që kanë pak lidhje të dukshme me sigurinë.
Një zyrtar i lartë i Shtëpisë së Bardhë, i cili foli në kushte anonimiteti, tha se administrata e konsideron argumentin e sigurisë një mënyrë për të forcuar pozicionin e Trump kur nismat e tij përballen me sfida ligjore.
“Ndryshon terrenin ligjor dhe politik të një mosmarrëveshjeje”, tha zyrtari, duke shtuar: “Po funksionon.”
Një tjetër zyrtar i lartë i administratës tha se, si komandant i përgjithshëm, Trump ka të drejtë të mbrojë sigurinë kombëtare.
Sipas tij, projekti i sallës së ballove përfshin përmirësime të sigurisë të zhvilluara në bashkëpunim me Zyrën Ushtarake të Shtëpisë së Bardhë dhe Shërbimin Sekret. Ai shtoi se gazetarët që kërkojnë informacione të klasifikuara dhe publikojnë të dhëna sensitive mund të veprojnë kundër interesave të sigurisë kombëtare të SHBA-së.
Një seri pengesash për Trump
Lëvizjet e fundit të Trump vijnë në një moment kur mbështetja publike për të ka rënë ndjeshëm. Një sondazh Reuters/Ipsos i publikuar të hënën e vendosi miratimin për presidentin në 32%, niveli më i ulët i karrierës së tij politike.
Vetëm 17% e amerikanëve thanë se miratojnë mënyrën se si ai po menaxhon koston e jetesës, ndërsa lufta në Iran mbetet gjerësisht e papëlqyer.
Vetëm gjatë pesë ditëve të javës së kaluar, Gjykata e Lartë rrëzoi përpjekjen e Trump për të kufizuar votimin me postë, çmimet e karburantit dizel arritën një rekord të ri dhe një gjykatës federal bllokoi vendosjen e emrit të Trump në fasadën e Kennedy Center.
Trump më pas kërcënoi se do të anulonte rinovimet e planifikuara të institucionit nëse vendimi nuk ndryshohej.
Edhe argumenti për harkun monumental duket se ndjek të njëjtën qasje të përdorur më parë për sallën e ballove. Në të dyja rastet, presidenti e ka paraqitur projektin si një çështje urgjente të sigurisë vetëm pasi nismat u përballën me padi dhe mungesë mbështetjeje në Kongres.
Në një postim të dielën, Trump tha se ushtria amerikane kishte kërkuar ndryshimet në projektin e harkut. Sipas tij, struktura do të ketë snajperë në çati dhe në shesh, si dhe dronë dhe “sasi të mëdha municionesh për snajperë”.
Harku pritet të ndërtohet pranë një rrethrrotullimi të frekuentuar, më pak se një milje nga Pentagoni.
Kritikët e kanë interpretuar këtë lëvizje si një përpjekje për të kapërcyer kundërshtimin ndaj monumentit.
Senatorja demokrate Tammy Duckworth tha se Trump po përdor ushtrinë si “mburojë politike” për të vijuar me projektin, ndërsa ekspertët e sigurisë ajrore, veteranët dhe një pjesë e publikut janë shprehur kundër tij.
Në rastin e sallës së ballove, zyrtari i Shtëpisë së Bardhë tha se përfshirja e argumentit të sigurisë mund të frenojë ndërhyrjen e gjykatave. Gjykata e Lartë muajin e kaluar lejoi vijimin e ndërtimit, duke iu referuar pjesërisht edhe shqetësimeve të sigurisë kombëtare.
Ekspertët ligjorë paralajmërojnë megjithatë se gjykatat mund të bëhen më pak të gatshme të pranojnë argumentet e Trump nëse koncepti i sigurisë kombëtare vazhdon të zgjerohet.
James Baker, drejtor i Institutit për Politikën dhe Ligjin e Sigurisë në Universitetin Syracuse dhe ish-gjyqtar federal, tha se përdorimi i tepruar i këtij argumenti mund të dëmtojë besimin tradicional që presidentët kanë gëzuar nga publiku dhe gjykatat kur kanë invokuar sigurinë kombëtare në mirëbesim.
Elizabeth Goitein, eksperte për sigurinë kombëtare në Brennan Center for Justice të Universitetit të Nju Jorkut, tha se gjykatat dhe Kongresi u kanë dhënë presidentëve hapësirë të konsiderueshme për çështjet e sigurisë, veçanërisht pas sulmeve të 11 shtatorit 2001.
Por, sipas saj, argumenti bëhet më i vështirë për t’u mbrojtur kur përdoret për çështje me pak lidhje të dukshme me sigurinë kombëtare, siç është rasti i harkut.
Ajo e cilësoi gjithashtu si “shumë transparente” përpjekjen për ta paraqitur mbulimin negativ mediatik të Shtëpisë së Bardhë si një çështje të sigurisë kombëtare dhe tha se kjo qasje mund të ketë efekt të kundërt.
