Senatori amerikan Bernie Sanders ka reaguar ashpër gjatë një interviste në CNN me Christiane Amanpour, duke deklaruar se veprimet e presidentit Donald Trump përbëjnë një shkelje të drejtpërdrejtë të Kushtetutës së Shteteve të Bashkuara dhe një kërcënim serioz për stabilitetin ndërkombëtar.
I pyetur për një votë të rëndësishme në Kongres lidhur me detyrimet kushtetuese mbi kompetencat e luftës, Sanders theksoi se vetëm Kongresi ka autoritetin për të shpallur luftë dhe se rasti në fjalë nuk ishte një emergjencë kombëtare, pasi SHBA nuk ishte sulmuar dhe situata nuk mund të krahasohej me Pearl Harbor apo 11 shtatorin.
Sipas tij, bëhej fjalë për një veprim të planifikuar për muaj me radhë, për të cilin Kongresi jo vetëm që nuk dha miratim, por as nuk ishte informuar, çka përbën shkelje të sundimit të ligjit. Sanders paralajmëroi se ideja që një president mund të pushtojë një vend tjetër sipas vullnetit të tij krijon një precedent të rrezikshëm, duke u dhënë justifikim çdo shteti apo grupi terrorist në botë të veprojë në të njëjtën mënyrë dhe duke e bërë botën më të paqëndrueshme.
Ai shtoi se kjo qasje u jep legjitimitet veprimeve të vendeve si Rusia apo Kina në rastet e ndërhyrjeve ushtarake dhe dobëson institucionet ndërkombëtare, duke theksuar se rreziku më i madh është përhapja e kaosit global dhe minimi i rregullave mbi të cilat bazohet rendi ndërkombëtar.
