Në episodin e fundit të podkastit “N’xhiro me Syçin”, Endri Shabani nuk i kursen ashpërsinë ndaj Erion Veliajt, të cilin e përshkroi si një zyrtar që ka humbur çdo formë legjitimiteti dhe përgjegjësie qytetare. “Erion Veliaj ka munguar në detyrë për rreth shtatë muaj,” tha Shabani, duke shtuar se në kushtet e një mungese të tillë “kjo do të sillte vakancë dhe nevojën për një kryetar të ri të zgjedhur nga qytetarët.”
Duke folur me tone të ashpra, Shabani e quajti situatën “farsë”: “Një kryetar bashkie që nuk buron nga vota e qytetarëve është i shkëputur nga përgjegjësia politike. Kjo është farsë,” tha ai, dhe akuzoi mungesën e llogaridhënies si shenjë të një sistemi që mbron pushtetin e jo qytetarin. Ai nuk u ndal me fjalë të buta: “Nuk duhet të ketë solidaritet kur dikush kapet duke vjedhur,” u shpreh Shabani, duke e paraqitur Veliajn si pjesë të një rrethi që gëzon privilegje pavarësisht dështimeve.
Shabani pranoi se disa projekte infrastrukturë (korsi biçikletash, hapësira publike) kanë qenë pozitive, por theksoi se “këto nuk mjaftojnë për të justifikuar zullumet dhe mungesën e llogaridhënies.” Ai kërkoi që institucionet të veprojnë dhe qytetarët të mos lejojnë që pushteti vendor të funksionojë si perandori personale.
https://www.youtube.com/watch?v=fq6u9Wn5e4E
