
John Lennon e quante veten një ëndërrimtar, por besonte se nuk ishte i vetmi. Me këtë mesazh nis një prej këngëve më të njohura dhe më me ndikim në historinë e muzikës botërore, “Imagine”, e cila edhe sot, më shumë se pesë dekada pas publikimit, vazhdon të përcjellë mesazhin e paqes dhe bashkimit mes njerëzve.
Lennon shkroi vargun e famshëm “Mund të thoni se jam një ëndërrimtar”, në fund të këngës, si një lloj kërkimfaljeje ndaj dëgjuesve. Përmes saj, ai i ftonte njerëzit të imagjinonin një botë pa ndarje, pa luftëra, pa kufij, pa prona dhe pa dallime fetare.
Në vitin 1971, kur bota ishte e ndarë nga konflikte të mëdha, veçanërisht Lufta e Vietnamit, mesazhi i këngës kishte një domethënie të veçantë. Lennon shpresonte se një ditë njerëzit do të bashkoheshin dhe bota do të jetonte në paqe.
Megjithatë, ideja e paqes nuk ishte e re për artistin. Që në vitin 1969, së bashku me bashkëshorten Yoko Ono, ai kishte nisur të promovonte mesazhin e paqes përmes nismës së njohur “Bed-In for Peace”.
Një nga elementët që e bën “Imagine” kaq të veçantë është thjeshtësia muzikore. Kënga mbështetet në një melodi të qetë pianoje, me një strukturë të thjeshtë dhe një interpretim që i jep edhe më shumë forcë mesazhit të saj.
Pikërisht kjo thjeshtësi ka ndihmuar që kënga të mbijetojë përtej modave muzikore. Ajo është interpretuar nga qindra artistë, mes tyre Elton John dhe Lady Gaga, është kënduar në homazhe pas tragjedive të ndryshme dhe është kthyer në një simbol shprese për miliona njerëz në mbarë botën.
John Lennon e regjistroi këngën në qershor të vitit 1971, në studion e tij në Berkshire, në praninë e Yoko Ono-s, ndërsa producent ishte Phil Spector. Në atë kohë, Lennon ishte 30 vjeç dhe kishte një vit që ishte larguar nga Beatles. Në regjistrim morën pjesë edhe Klaus Voormann në bas dhe Alan White në bateri.
“Imagine” nuk është thjesht një këngë, por një thirrje për një botë më të mirë, ku njerëzit mund të jetojnë së bashku, përtej dallimeve dhe ndasive.
Mesazhi i saj mbetet aktual edhe sot: një botë pak më e mirë, më e drejtë dhe më paqësore është një ëndërr që miliona njerëz vazhdojnë ta ndajnë.



