Kryeministri i Kosovës, Albin Kurti, ka vendosur si kusht të qartë për qeverinë e ardhshme të Serbisë njohjen e pavarësisë së Kosovës.
Në një intervistë për Radio France Internationale (RFI), Kurti ka shprehur shpresën se Lista Studentore, e cila doli fituese në zgjedhjet parlamentare të 25 tetorit në Serbi, do të zgjedhë një qasje të re dhe do të angazhohet për normalizimin e marrëdhënieve mes dy vendeve. Ai theksoi se mbetet të shihet qëndrimi që do të mbajë kjo forcë politike pas formimit të qeverisë, duke bërë thirrje për pranimin e realitetit politik.
“Njohja e pavarësisë është testi themelor për demokracinë në Serbi”, u shpreh Kurti, duke shtuar se demokracitë duhet të bashkëpunojnë për interesa të përbashkëta. Kryeministri kritikoi gjithashtu presidentin serb Aleksandar Vuçiç për të kaluarën e tij politike gjatë regjimit të Millosheviqit, ndërsa rikonfirmoi dëshirën e Kosovës për t’u anëtarësuar në Bashkimin Evropian.
