Kosova hyn të enjten zyrtarisht në fushatën zgjedhore për zgjedhjet parlamentare të 7 qershorit, në një proces që zhvillohet pas një periudhe të tensionuar politike dhe pas disa proceseve zgjedhore brenda një harku të shkurtër kohor.
Zgjedhjet e reja vijnë pas krizës institucionale të krijuar nga dështimi i Kuvendit për të zgjedhur presidentin brenda afatit kushtetues, duke çuar vendin në një cikël të ri elektoral.
Subjektet kryesore politike kanë paralajmëruar nisjen e aktiviteteve hapëse të fushatës në qytete të ndryshme të Kosovës, ndërsa gara pritet të jetë e fokusuar te përplasja mes partive kryesore dhe kandidatëve për drejtimin e qeverisë.
Lëvizja Vetëvendosje do ta hapë fushatën në Ferizaj në orën 19:30, me një tubim në palestrën sportive të qytetit, ku kryeministri aktual Albin Kurti synon një mandat të ri qeverisës.
Partia Demokratike e Kosovës do të zhvillojë aktivitetin hapës gjithashtu në Ferizaj në orën 20:00, me kandidatin për kryeministër Bedri Hamza.
Lidhja Demokratike e Kosovës do ta nisë fushatën në sallën “1 Tetori” në Prishtinë në orën 18:00, duke hyrë në garë me Vjosa Osmanin si kandidate për presidente dhe Lumir Abdixhikun si kandidat për kryeministër.
Ndërkohë, Aleanca për Ardhmërinë e Kosovës do ta çelë fushatën në Gjakovë në orën 19:45, me Ardian Gjinin në garë për kryeministër, pas tërheqjes së Ramush Haradinajt nga drejtimi i partisë.
Sipas kalendarit zgjedhor, fushata do të zgjasë deri më 6 qershor, një ditë para votimit, ndërsa partitë pritet të intensifikojnë aktivitetet e tyre në gjithë territorin e vendit.
